دەرهێنەر (ڕێکەوت حەمە تۆفیق) لە ساڵی ١٩٨٢ لە دایکبووە، ساڵی ٢٠٠٤ بەشی شانۆی پەیمانگای هونەرە جوانەکانی سلێمانی تەواو کردووە، وە ئەندامی کارای هەریەک لە سەندیکای هونەرمەندانی کوردستان و کۆمەڵەی هونەرە جوانەکانی کورد و یەکێتی وێنەگرانی کوردستانە، وەک ئەکتەری شانۆ کاری هونەری کردووە و پاشان کاری دەرهێنانی بۆ چەندین شانۆگەری و کورتە فیلم و درامای تەلەفزیۆنی کردووە و بەرهەمەکانی لە ناوەوە و دەرەوەی کوردستان نمایش کراوە و خاوەنی چەندین خەڵاتە و لە ساڵی ٢٠١٥ خەڵاتی تایبەتی بەخششی هونەری لاوانی وەک فیلمسازێک لە لایەن وەزیری ڕۆشنبیری پێ بەخشراوە.

ئەو کارە هونەریانەی کە وەک ئەکتەر تیایدا بەشداربووە:

- وەک ئەکتەر بەشداری لە ١٨ شانۆیی کردووە لە سلێمانی و شارەکانی تری هەرێم و دەرەوەی هەرێم.

- وەک ئەکتەر بەشداری لە چوار درامای تەلەفزیۆنیدا کردووە.

- وەک ئەکتەر بەشداری لە هەردوو کورتە فیلمی (ڕابوون، ڕوباری بێدەنگ)دا کردووە و لە یەکەمین فێستڤاڵی کورتە فیلم لە لەندەن نمایش کراوە.

ئەو کارانەی کە وەک دەرهێنەر کاری تیادا کردووە:
- کاری یاریدەدەری شانۆی بۆ پێنج شانۆیی کردووە.
- کاری دەرهێنانی بۆ سێ شانۆیی مناڵان کردووە.
- کاری یاریدەدەری دەرهێنەری بۆ سێ کورتە فیلم کردووە.

- کاری یاریدەدەری دەرهێنانی لە درامایەکی تەلەفزیۆنیدا کردووە.

- کاری دەرهێنانی بۆ هەریەک لە کورتە فیلمەکانی (هەنار، ڕوخسار، ئەڵقە، چرکەسات) کردووە و لە ناوخۆ و لە دەرەوەی هەرێم لە فێستیڤاڵەکان بەشداریان پێ کراوە و چەند خەڵاتێکیان بەدەست هێناوە.
- کاری نووسین و دەرهێنانی بۆ فیلمێکی دۆکیۆمێنتاری کردووە تایبەت بە یۆبیلی زێڕینی کۆمەڵەی هونەرە جوانەکانی کورد.
 وە کاری وێنەگرتنی بۆ کورتە فیلمی (یادەوەری) کردووە و ساڵی ٢٠١٦ لە وڵاتی سوید نمایش کراوە.